Ný stjórn yfir Innheimtustofnun sveitarfélaga

Ný stjórn hefur verið skipuð yfir Innheimtustofnun sveitarfélaga og starfsemi hennar. Stjórnin tók við í gær, mánudaginn 13. desember, í kjölfar þess að fráfarandi stjórn óskaði eftir að stíga til hliðar. Samband íslenskra sveitarfélaga skipaði tvo fulltrúa í nýja stjórn stofnunarinnar, sem er sameign allra sveitarfélaga í landinu. Innviðaráðherra skipaði einn fulltrúa, sem jafnframt verður formaður stjórnarinnar.

Ríkisendurskoðun hóf úttekt á verkefnum Innheimtustofnunar sveitarfélaga í september sl. að ósk samgöngu- og sveitarstjórnarráðuneytisins. Það var gert vegna fyrirhugaðrar tilfærslu verkefna Innheimtustofnunar til ríkisins en viljayfirlýsing þess efnis var undirrituð í janúar fyrr á þessu ári af fulltrúum ríkisins og Sambandi íslenskra sveitarfélaga.

Úttektinni er ætlað að greina núverandi skipulag, rekstur og kostnað við verkefni Innheimtustofnunar og hins vegar að greina með hvaða hætti verkefnum stofnunarinnar verði best komið fyrir hjá ríkinu.

Ríkisendurskoðun upplýsti ráðuneytið í byrjun desember m.a. um að svör Innheimtustofnunar sveitarfélaga við úttektarspurningum væru óviðunandi.

Ný stjórn Innheimtustofnunar sveitarfélaga ákvað í dag að senda tvo stjórnendur Innheimtustofnunar í tímabundið leyfi frá störfum til að ný stjórn geti farið yfir stöðuna og Ríkisendurskoðun lokið úttekt á verkefnum og starfsemi Innheimtustofnunar. Starfsemi verður að öðru leyti óbreytt.

Innheimtustofnun sveitarfélaga er sameign allra sveitarfélaga í landinu og er hlutverk hennar að innheimta meðlög hjá meðlagsskyldum foreldrum sem Tryggingastofnun ríkisins hefur þegar greitt forráðamönnum barna þeirra á grundvelli laga um almannatryggingar.

Í nýrri stjórn sitja Aldís Hilmarsdóttir, formaður, skipuð af innviðaráðherra, Jón Páll Hreinsson og Þóra Björg Jónsdóttir, skipuð af Sambandi íslenskra sveitarfélaga. Nýja stjórnin var skipuð á grundvelli 2. gr. laga um Innheimtustofnun sveitarfélaga, nr. 54/1971.

Verkefni nýrrar stjórnar er, auk lögbundinna verkefna, að tryggja að starfsemi Innheimtustofnunar geti haldist í réttu horfi á meðan farið er yfir starfsemi stofnunarinnar.